ما بدي ساوي دايت…
أو شغلتي كم كيلو ما خرج ساوي دايت …
نفسيتي غير مهيئة لأعمل دايت والتزم ….
عندي عيلة وولاد ولازم أطبخلن ….
ولا فيني أترك خبز ولا نشويات ….
ولا بقدر اشترك مع أخصائي ولا عندي وقت التزم ببرنامج محدد …..
حامل مرضع إلخ ….
عندي ضيوف … أو قاعدة عند ناس معينين ومو قادرة ألتزم …
أي شي المهم حافظ عصحتي …..
.
.
.
شو ساوي ؟
.
.
.
بصراحة للوهلة الأولى ….
لما تشوف هيك حكي ممكن يستفزك و يعصبك حتى ….
إنو مو معقول كمية التشاؤم 
.
.
بس لما تجي وتتمعن بهالحروف بتلاقي معاناة إنسان وحرب نفسية عبيعيشا …..
وفعلا الله لا يعيشنا ظروفو ….
بالذات المرأة يللي عمتطبخ لولادا وعيلتا وأبو العيال بياكل كتير وما بيسمن ومقضيها حلو وسئسئة من السوق
….
.
.
لهيك هالبوست مخصص إلك إنت بالذات ….
من أولها إذا ما بدك تقرا فإنت بصراحة جاي تتسلا علينا مو جاي تساوي دايت ….
1 …لا تفكر بالدايت ولا تقرر إنك رح تساوي دايت ولا تحدد موعد ويوم رح تبلش فيه …..
2 …بهي اللحظة يللي إنت فيها خود مقاساتك كلها ….
ووزنك ….(عالميزان) بأخف كمية ممكنة من التياب ….
وخدلك كم صورة عالمراية مو خسران شي خليهم عجوالك …
وإذا في نية تنزل تجربتك مستقبلا …
خدن بتياب حلوين وبيناسبوك وبيناسبو طلعتك ….
3 …إنزل عالسوق تبضع شوي جيب خل التفاح الأصلي (بعلبة بلور) …
جيب شوية سمسم غير محمص…
شوية بذور الشيا …..
واختار نوعية خبز مكتوب عليها لو كارب لو كنت بأوروبا أو خبز شعير أو خبز شوفان المهم ما بدنا خبز أبيض وفي حال ما فيك بدونو ….
خليك عالخبز الأبيض معلش بس كمل قراءة …
جيب سمن حيواني أو زبدة حيوانية وأكيد عندك زيت زيتون …
جيب لبن عالي الدسم أو لبنة أو لبن غنم ……
جيب كم نوع جبن عالي الدسم (ما يكون مكتوب عليه لايت )
حاول تنوع شوي باللحوم جيب وقية من كل نوع …صدر…فخد ..جنح …سودة …قلوبات ….سمك ….
إنزل عند الخضرجي جيب خضروات يللي ببالك لطبخات البيت وبطريقك جيب باقة بقدونس باقة جرجير باقة بقلة ختار أي نوع ورقيات أو نوعين جيب منو ويفضل تكون بتحبن…
وجيب شوية فواكه وبعد عن المنغا والموز واذا بتحب الفريز والتوت الأسود والأزرق والأحمر والأسود وجوز الهند جيب منهم هدول ما فيهم سكر كتير…..
وأفوكادو حاول تكون مستوية شوي يعني إضغط اصبعتك لازم يعلم محلا وتغور شوي….
مر بطريقك عند الموالح جيب 200 غرام من كل نوعية بتحبن مكسرات ….
الأفضل لوز جوز حاول تجيبهم مو محمصين حتى تاخد فوائدهم كاملة….
كل يوم
بتملا قنينة ليترين مي مع ملعقتين خل كبار …
بتقول خلص هدول لازم خلصن كل يوم ….
لما تشوفا بطريقك خدلك كاسة وقبل كل وجبة بنص ساعة خود كاسة ….
بتجي لوجبة الفطور ….
دائما خلي بوجبتك بيضة ل 3 مسلوق أو مقلي بزبدة أو سمنة حيوانية …
زيتون مسموح عشرة لعشرين حبة …
عطون مسموح 10 لعشرين حبة …
المكدوس الصحي لزيت زيتون وحدة وسط …
أي نوع جبنة دسمة 100 غرام..
أي نوع لبن مانو لبن دايت 150 غرتم …..
شنكليش 50 غرام……
مسبحة (حمص بطحينة)بحدود تلت ملاعق ….
متبل بحدود تلت ملاعق…..
أفوكادو مهروسة مع تومة وفليفلة حدة وملعقتين زيت زيتون وليمونة معصورة وشوية ملح وفلفل بتصير متبل أفوكادو طعمتو بتجنن منجربو مو خسرانين شي …..
الفطور بتختار البيض …مع ملعقتين دهن عكيفك زيت أو سمنة أو زبدة
ودائما صحن سلطة ورقية بقدونس أو جرجير أو بقلة إلخ …
وحطلا ملعقة سممسم أو بذور وإذا ما حبيت فكرة خل التفاح بالمي حط ملعقة للسلطة وشوية ليمون …..
وبتختار نوعين من البقية …
وحكينا حسب نوع الخبز يللي قررت ما تعيش بلاه …..
بتحط ببالك رغيف واحد مسموح لكل اليوم إذا أبيض قسمو عوجباتك …
أو رغيف ونص رقاق من باقي أنو الخبز ويفضل خبز شوفان أو خبز لو كارب …
هيك خلصنا من الفطور ….
منجي لفكرة السناك…
إما بين الفطور والغدا أو بالسهرة ….
اختار اللي بيناسبك …
ممكن تاخدو معك عالشغل ….
قبضة مكسرات كبيرة …من النوع يللي بتختارو (قبضة تحت ال50 غرام )…
وقطعة لقطعتين فاكهة حجم صغير …
كل الفواكه مسموحة ومنفضل تبعد عن المنغا والموز وأي شي الحلو تبعو ظاهر ومستوي يعني اعتمد تفاح حامض شوي كيوي وهكذا ……
منجي للغدا ….
خليك مع أكل البيت …
حكينا عن الخبز سابقا بتوزعو عكيفك فطور او غدا او بتقسمو بالنص ….
حسب وجبتك …
قبل كلشي خلي طبخك بالبيت بزيت زيتون ….أو سمنة أو زبدة حيوانية ….
وخلي دائما تركيزك عاللحوم بالوجبة …
لنفرض اليوم طابخين محشي وصي العيلة تكون محشياتك بكمية لا تتجاوز 7 مللاعق رز ودعمها باللحمة ….
لنفرض طبختك لحمة بصينية ستخدم الخبز المسموح يللي كتبناه فوق أو زيدو حبة حسب ضميرك…
لنفرض أكلك برغل خود 7 لعشر ملاعق وركز عالأكل يللي جنب البرغل أكيد في شي مطبوخ ….
نفس الشي البطاطا خليها تحت 200 ل 150 غرام مع اللحوم ….وإبعد عن القلي …أو أقليها بزيت زيتون ونشفها منيح بالبيت…
نفس الشي الرز مع ملوخية ركز عالملوخية واللحمة … وحدد كمية الرز …..
لا تنسى خل التفاح والسلطة….
ولا تنسى صحن الورقيات يللي عليه ملعقة سمسم ……
ومرق يوم أو تنين بالأسبوع سمك بحري أو نهري معلش حسب المستطاع….
إنت لحالك رح تعرف شوي شوي عشو تركز وعشو تاكل وشو الكمية يللي تحددها …
حاول تلتزم أسبوع رح تلاقي فرق منيح بجسمك ومقاساتك وبطنك حاول تاخدن لتحفز نفسك بالذات المقاسات …
رح تكره الأكل شوي ورح تنفر من النشويات لحالك ….
هون بتكون جاهز للحركة التانية ….
وهي توقف الخبز ….
أسبوع تاني ساوي نفس الشي …..
الخطوة التالتة سحب النشويات أو قلل كتيررر ..
هيك بتصير لو كارب ……..
آخر خطوة هو تحدد كمية الفواكه عنا بالكيتو المسموح والمفضل ….
فريز أفوكادو توت ازرق توت اسود توت أحمر جوز الهند…
تفاحة صغيرة 50 غرام …
كيوي صغيرة 50 غرام …
وبشكل عام تبقى الفواكه حسب نوعها …
وهيك بتصير كيتو بدون ما تحس …
فيك توقف عند أي مرحلة بدك ياها …
وآخر شي فيك تستغني عن الفطور مثلا (حتى لو ما وصلت للكيتو فيك تدمج الصيام مع أي ريجيم)….
وتصير تمارس الصيام المتقطع …
يعني في فترة كل يوم مثلا 6 ساعات أو 8 باكل فيها وباقي الوقت بشرب سوائل ومي ومشروبات بلا سكر …..
باكل أول وجبة 11 وبضل بدفش الفطور ليوصل ل 1 وإخر وجبة 7 هيك صمت 18 ساعة ؟ وفيك 16 ؟
وإذا السكر مقدس بأقل كمية ممكنة والأفضل تجيب أي بديل متوفر ….
ستيفيا اريثريتول اكسليتيلول مونغ فروت …..
(بسوريا متوفر ستيفيا بالبذورية ربع ملعقة صغيرة بتعادل 3 ملاعق كبار)
وحتى السكرين بشكل مؤقت فينا نستخدمو ولوو كان صناعي ….
بتعشق الكولا استبدلا هالفترة بالبيبسي داايت وحاول تخففا مستقبلا ….
طلعت مشوار اختار اللي حكينا عليه فوق …….
(يوم المشوار حاول تصوم 20 ل 22 ساعة وتخليها وجبة شبه فري بأقل الخسائر …إنت لوحدك ما رح تسخى تاكل كتير)
أتصفح وفوت عكروبات الدايت وشوف طبخات الصبايا والشباب وساوي متلا ….
شوي شوي عود حالك عالمشي ….
مشوارك بالسرفيس ربع ساعة خدها تمشاية وفر إجرة تكسي بتفيد جسمك صحتك ……
مارس أي رياضة بتقدر تساويها ….
إنت يللي عندك جهاز أوربيت أو تريد ميل وعاملو منشر غسيل وبدك تبيعو نزل التياب عليه وستفيد منو شوي هلأ أجا الوقت لتطالع سعرو لأني بعد فترة رح تتحمس وتعشق حالك وتسجل بنادي وتبيعو…
طيب ولو بنت كنتي فيكي تساوي شوية تمارين أو حتى الرقص مفيد المهم شب تحرقي فيو سعرات…..
حب حالك بكل ظروفك …..
وكون قوي ….
.
.
